Poetry In Urdu– Best Urdu Shayari & Ghazals Collection - DARWAISH۔WRITES

Poet:وسیم خیر آبادی
By: Darwaish.writes

 پھول اپنے وصف سنتے ہیں اس خوش نصیب سے 

کیا پھول جھڑتے ہیں دہن عندلیب سے 

افشاں تری جبیں کی ہماری نظر میں ہے 

ہم دیکھتے ہیں عرش کے تارے قریب سے 

تنہا لحد میں ہوں تو دباتے ہیں یہ مجھے 

کیا کیا الجھ رہے ہیں ملک مجھ غریب سے 

کعبہ میں ان کا نور مدینے میں ہے ظہور 

آباد دونوں گھر ہیں خدا کے حبیب سے 

یا رب برا ہو دل کی تڑپ کا کہ بزم میں 

بیٹھے وہ دور اٹھ کے ہمارے قریب سے 

مر جاؤں میں تو جاؤ مبارک ہو جان من 

اللہ سے مجھے تمہیں ملنا رقیب سے 

پہلو تہی جو کرتی ہے ملنے میں میری نبض 

کہتے ہیں یہ شریر ملی ہے طبیب سے 

ممنون ہوں میں حضرت نوشادؔ کا وسیمؔ 

ملتے ہیں کیا بہ لطف حضور اس غریب سے