Poetry In Urdu– Best Urdu Shayari & Ghazals Collection - DARWAISH۔WRITES

Poet:عاصم واسطی
By: Darwaish.writes

 

 ہے مستقل یہی احساس کچھ کمی سی ہے 

تلاش میں ہے نظر دل میں بیکلی سی ہے 

کسی بھی کام میں لگتا نہیں ہے دل میرا 

بڑے دنوں سے طبیعت بجھی بجھی سی ہے 

بڑی عجیب اداسی ہے مسکراتا ہوں 

جو آج کل مری حالت ہے شاعری سی ہے 

گزر رہے ہیں شب و روز بے سبب میرے 

یہ زندگی تو نہیں صرف زندگی سی ہے 

تھکی تو ایک محبت نے موند لی آنکھیں 

ہر ایک نیند سے اب میری دشمنی سی ہے 

ترے بغیر کہاں ہے سکون کیا آرام 

کہیں رہوں مری تکلیف بے گھری سی ہے 

نہیں وہ شمع محبت رہی تو پھر عاصمؔ 

یہ کس دعا سے مرے گھر میں روشنی سی ہے